Framtíðarsýn fyrir grunnskóla í......

Það er gaman að lesa fundargerðir menntaráðs og fylgjast með því sem þar er rætt.  Síðasta mánudag var fundargerðin sérstaklega áhugaverð.  Þar er sagt frá framtíðarsýn fyrir skóla í Úlfarsárdal og hljómar hún vel.  Þeir áhersluþættir sem skólarnir eru hvattir til að móta sína sérstöðu með eru:

• Listir og lýðheilsa
• Náttúra og umhverfi
• Læsi, lesskilningur og bókmenntir

Þá verða mannréttindi, mannauður og virðing ríkjandi í starfi skólanna, skóladagurinn samþættur og leitast verður við að skapa samfellu í skóla og tómstundum. Þetta boðar nýja og spennandi tíma í skólastarfi borgarinnar ekki síst ef markmiðum um samfellu í starfsdegi nemenda tekst.  Nýir tímar fram undan með háleitum markmiðum og tekur mið af því þjóðfélagi sem við búum við í dag og ekki síst samstaða hjá þeim sem standa að málum.  Allt gott og blessað ef gott fólks fæst til þess að hrinda þessum háleitum og framsæknum markmiðum í gagnið. Til þess þarf að efla stöðu kennara, bæta virðingu þeirra og hækka launin. Kom í veg fyrir þann flótta sem nú er yfirvofandi  Þetta kom einnig fram á fundinum og telur Júlíus Vífill helsti vandi skólanna vera lág laun kennara, hann bindur vonir við að komandi kjarasamningar muni leysa þessi mál!!! Ég geri það líka.

Lifið heil

Rósa rólega 

Hugsjón eða heimska

Hvað er það sem rekur mig og aðra kennara fram úr á morgnanna? Hvað er það sem gerir það að verkum að við mætum aftur og aftur á hverju hausti með bros á vör og tilbúin í átök vetrarins? Hvað er það sem fær mann til að setjast niður á kvöldin og reyna að finna eitthvað skemmtilegt til að gera í fyrramálið? Er það hugsjónin ein, er það skyldurækni eða er þetta heimska? Þegar stórt er spurt þá er fátt um svör en annað brennur heitar á mér þessa dagana.  Hvað er það sem fær kennara með stuttan starfsaldur til að skila inn uppsagnarbréfum þessa dagana, hvað er það sem gerir kennara með reynslu útbrennda fyrir aldur fram? Margir af þeim góðu kennurum sem ég þekki eru að íhuga breytingar vegna lélegra launa og álags í starfi.  Sá starfsvettvangur sem við höfum búið við í vetur er slæmur og kennarar eru að hrökklast í burtu, þeir geta ekki meira.  Það verður einhver að vakna til vitundar um að ástandið í skólum er ekki gott. Launin of lág, álagið of mikið og verður meira þegar áhyggjur skólastjórnenda af mannaráðningum bætast ofan á allt sem fyrir er. Hvernig verður ástandið þar sem endurnýjun er mikil á hverju ári.

Lifið heil

Rósa raunamædda 

Öskudagur

Síðustu ár hefur það verið hefð að reykvískir grunnskólakennarar sæki ráðstefnu á öskudag.  Nú í ár var það engin undantekning. Öskudagsráðstefnan var haldin á Hilton og var yfirskriftina "Halakörtur og hagnýt ráð".Þarna voru samankomnir um 600 grunnskólakennarar og skólastjórnendur. Aðalfyrirlesarar voru þau Laura Riffel sérfræðingur í bekkjarstjórnun og hegðunarfrávikum og John Morris skólastjóri í Ardleigh Green Junior School í Essex Englandi.  Í stuttu máli voru þessir fyrirlesarar frábærir og er það margt sem við getum lært af þeim.  Það er gott að fá tækifæri til að hlusta á fólk sem náð hefur árangri í kennslu og vakið  athygli.  Á sama tíma er einnig vert að skoða það  sem vel er gert hér á landi eins og stutt innlegg Nönnu Hlífar Ingvadóttur tónmenntakennara í Vesturbæjarskóla í upphafi ráðstefnunnar, það var frábært. Ég var svo heppin að fá að sitja námskeið með Lauru Riffel á þriðjudaginn, mig langar að taka fyrstu flugvél til London og sjá betur hvernig John vinnur með drengi í skólum en kannski er best að skella sér í dagsferð vestur í bæ og sjá hvað verið er að gera þar. En skemmtilegast af þessu er komast út úr húsi, hitta aðra kennara og hlæja saman, við komum margföld til baka eftir þennan stutta tíma, tilbúin til að prófa eitthvað nýtt.

Júlíus Vífill

Þá er Júlíus Vífill kominn aftur til starfa í menntamálum borgarinnar eftir nokkuð frí. Eldhress og fullur af eldmóði.  Vil ég óska honum góðs gengis í starfi.  Hann setti Öskudagsráðstefnu reykvískra kennara og fluttu okkur gleðifréttir.  Sagði að á morgun fimmtudag yrði lagt fram í borgarráði tillaga um aukið framlag til skóla borgarinnar til að greiða fyrir álag og sérverkefni.  Þetta hljómar vel í byrjun og er ég spennt að vita hvað þetta inniheldur.  Síðasta dúsa var um  það bil 5000 kr að ógleymdu sundkorti frá Degi.

Lifið heil

Rósa bjartsýna 

Kennarar þurfa hærri laun

Segir hæstvirtur menntamálaráðherra Þorgerður Katrín. Ég er henni sammála og er er viss um að það eru fleiri. Gott að vita að hún fylgir okkur að þessu sinni þegar við erum að fara sigla inn í harða kjarabaráttu. Í síðasta verkfalli sagði hún í sjóvarpsviðtali að henni kæmi okkar barátta ekki við. En nú er viðsnúningur og  býð ég hana velkomna í hópinn. Eins og Þorgerður segir hafa kennarar  dregist aftur úr öðrum stéttum í launum  og það þarf að leiðrétta. En eitthvað hangir annað á spýtunni og því þurfum við kennarar að vera varkárir og passa að láta ekki snuða okkur eina ferðina enn.  Ég ætla að lesa betur yfir þetta fína frumvarp og skoða hvað í því felst ekki eingöngu fyrir nemendur heldur ekki síður fyrir okkur sem störfum í skólanum.  Eitt af því sem þar kemur fram er að lengja skólann um 10 kennsludaga, jú þá er hægt að borga okkur hærri laun en hver fær ekki hærri laun fyrir að vinna meira. Í síðustu kjarasamningum höfum við skipt úr nokkrum krónum fyrir meiri vinna, sem ég tel nú ekki vera kjarabót og þurfum við að standa vörð um það sem eftir er.
Þorgerður telur nauðsynlegt að hækka laun kennara til að fá gott fólk inn í skólana og vonandi finnst henni einnig ágætt að halda  í það ágæta fólk sem enn er að störfum þar. Eins og margir vita er í frumvarpinu ákvæði um aukna menntun kennara og er það gott en í ljósi lélegra launa verður enn erfiðara að manna stöður ef ekki er hægt að bjóða hærri laun en nú er eftir að hafa menntað sig í 5 ár. Nógu erfitt er ástandið núna. 

 

Gættu hugsana þinna......

Hugleiðing í lok vikunnar 

• Gættu hugsana þinna, þær verða orð þín.
• Gættu orða þinna, þau verða gerðir þína.
• Gættu gerða þinna, þær verða vani þinn.
• Gættu vana þíns, hann verður persónuleiki þinn.
• Gættu persónuleika þíns, hann verður örlög þín.

(Frank Outlaw)

Góða helgi

Rósa

Er hrós málið?

Margir kennarar eru að sligast undan agaleysi í íslenskum börnum.  Margir ganga svo langt að segja að þetta sé illa uppalið allt saman.  Þeir eiga allir góð börn sjálfir.  Þegar þeir fara svo í skólaheimsóknir til annarra landa þá tala þeir um hvað allir þar hafi verið stilltir og prúðir að það væri nú munur að kenna svona börnum.  Þetta eru þreyttir kennarar sem vinna of mikið, álagið úr hófi og launin of lág.  En skólinn endurspeglar þjóðfélagið, það eru agalaust þá er ekki von á öðru í skólanum eða hvað.  En hrósum við nógu mikið.  Ég held ekki.  Getum við ekki tekið okkur á í þeim efnum.  Hrósað nemendum okkar í skólanum fyrir einfalda og sjálfsagða hluti.  Fundið eitthvað jákvætt við þau sem sjaldan fá hrós frekar last.  Allir hafa jú eitthvað til brunns að bera er það ekki.  Ef við hugsum um þetta er ég viss um að það kemur okkur á óvart hvað það er margt gott í hverjum einstaklingi.  En við megum ekki gleyma að hrósa samferðarfólki okkar, vinnufélögum og fjölskyldumeðlimum, mikið svakalega er þetta flott peysa sem þú ert í Ingibjörg mín og voðalega bakar þú alltaf góðar kökur Þórdís.  Ameríkanar gera þetta daginn út og inn og krakkarnir þar eru allir stilltir í skólanum eða svo er okkur sagt. :-) Ert þú búin að hrósa einhverjum í dag? Þegar þú stendur upp eftir að hafa lesið þetta hrósaðu fyrstu manneskunni sem þú hittir og reyndu að hrósa 10 sinnum á dag.  Láttu mig vita hvernig gengur. Þér á eftir að líða betur og þeim í kringum þig enn betur.

Lifið heil

Rósa hrósa 

Bráðum kemur betri tíð eða hvað?

Júlíus Vífill er enn og aftur komin í forsvar fyrir menntamál borgarinnar og hefur tjáð sig um ástandið í skólum.  Hann er sammála því að orsök manneklu sé léleg laun og ef að við viljum hafa góða skóla þurfi að greiða kennurum hærri laun.  Að þessu sjáum við að hann stendur með okkur eða hvað.  Ég er nú ekki svo sannfærð en reyni að vera bjartsýn.  Ég veit að til eru peningar til að borgar hærri laun, viljinn er fyrir hendi og fordæmi eins og sést á launahækkun til stundarkennara. En það var einhliða ákvörðun launanefndar seint í haust að tímakaup stundarkennara hækkaði úr 1400 kr á tímann í 2400 krónur.  Þannig að ef stundarkennari er ráðinn þá er hann á hærra kaupi en grunnskólakennari með 10 ára starfsaldur 2400 *26 kennslustundir á viku *4 vikur = 249600 á mánuði. En aldur og menntun skiptir ekki máli.  Ef þetta hefur viðgengst í vetur þá hljóta þeir að geta hækkað laun mín umtalsvert í vor.

Lifið heil

Rósa ráðvanda 

Réttur brotinn á nemendum vegna.......

Á forsíðu Fréttablaðsins í gær er frétt um manneklu í Grunnskólum Reykjavíkur og var einn skóli sérstaklega nefndur.  Þar þarf að skerða stundartöflur nemenda vegna kennaraskorts. Rætt er við Ólaf Loftsson formann Félags grunnskólakennara um ástandið og kemur hann inn á að þetta hafi verið fyrirsjáanlegur vandi eins og ég hef nokkrum sinnum bent á.  En réttur nemenda er brotinn vegna þess að þeir fá ekki þann kennslustundafjölda sem kveðið er um.  En þá spyr ég á móti er réttur nemenda ekki brotinn þegar verið er að redda skorti á kennurum  með hinum og þessum .  Hvernig er þetta þar sem ekki fæst réttindafólk til starfa og ráðnir eru þess í stað einstaklingar með "góða" menntun.  Er ekki verið að brjóta á rétti nemenda?  Í mörgum skólum hafa kennarar og jafnvel annað starfsfólk bætt á sig vinnu til að "hafa ofan af " fyrir nemendum er ekki verið að brjóta á rétti nemenda til lögboðinnar kennslu með þessum reddingum? Í athugun sem gerð var í skólum borgarinnar nú í janúar kom í ljós að aðeins 17 skólar af 38 eru fullmannaðir, hvað þýðir það að vera fullmannaðir skólar?  Er þá réttindafólk í öllum stöðum og enginn að vinna meira en hann ætlaði sér í upphafi skólaárs eða eru þeir kannski enn færri skólarnir sem eru "fullmannaðir". Ég tek undir orð Ólafs um að staðan sé slæm en að hún eigi eftir að versna ef náist ekki að semja strax í vor. 

Lifið heil

Rósa raunamædda

Horft fram á veginn

Jæja þá hef ég lengið undir feld of lengi og mál til komið að skella sér á fætur og undirbúa andann fyrir komandi kjaraviðræður.  Eftir langvarandi tölvuleysi hef ég átt við rifstíflu og framkvæmdarkvíða að stríða en þetta gengur ekki lengur og með hækkandi sól á birtir til í sálinni.  Fréttirnar í 24 stundum í dag um að sérsamningar kennara við einstök sveitafélög gætu verið inn í myndinni í komandi viðræðum boðar spennandi tíma fram undan.  En hvort þetta sé eitthvað sem segir til um innihald þegar við borðið er komið er ekki gott að segja.  Reyndar hef ég ekki trú á því að sérsamningur við kennara í Reykjavik verði innihaldsríkir því Reykjavíkurborg hefur verið það sveitafélag sem helst hefur haldið að sér höndum þegar svona mál koma upp því flestir vilja búa og starfa hér á þessu svæði.  Og ekki geri ég ráð fyrir miklum tekjuafgangi hjá borginni þegar svo margir borgarstjórar eru á háum launum.