Atvinna í boði

Jæja nú er fríið á enda og vinnan byrjar í fyrramálið.  Ólíkt sætu strákunum á myndbandinu í síðustu færslu þá hlakka ég til að mæta.  Nú er að bretta upp ermarnar og gera allt klárt fyrir lokatörnina í skólanum.  Stutt eftir fram á vor.  En vorboðinn er mættur í formi atvinnuauglýsinga skólayfirvalda víðsvegar um landið.  Þetta birtist í hátíðardagblöðunum.  Í Reykjavík er búið að auglýsa eftir 87 kennurum í 26 skóla, enn eru nokkrir skólar eftir að auglýsa þar sem starfsmannaviðtölum er ekki lokið.  Kennara vantaði reyndar á flestum stöðum í eintölu þ.e. "kennara vanta á miðstig, kennara vantar á yngsta stig", og veit ég að í mörgum tilfellum er átt við fleiri en einn á hverju stigi.  Þá margfaldast þessi tala 87.  Í öðrum sveitafélögum vantar einnig slatta af fólki, Reykjanesbær er með stóra auglýsingu og fleiri spennandi staðir.  Næstu daga fáum við vonandi að heyra eitthvað meira frá samninganefndinni sem verður síðan til þess að auðvelt verður að ráða í þessara stöður.  Eða því verðum við að trúa.

Lifið heil

Rósa rauða 

Að koma aftur í skólann eftir frí

Þetta verðið þið á kíkja á þótt langt sé. http://www.youtube.com/watch?v=QYJn7oG-bpE

Ég get ekki sett þetta inn  með því að klikka á you tube merkið er einhver sem veit afhverju?  En allavega virkar linkurinn hér að ofan. Góða skemmtun

 

Geta foreldrar verið til vandræða?

Í nýlegri skýrslu sem unnin var af Cambridge háskóla um agavandamál í skólum kemur fram að foreldrar eiga þátt í vaxandi agavandamálum í Bretlandi. Þetta eru foreldrar nemenda sem eru vanir að fá það sem þeir vilja og ef ekki þá tryllast þeir bara. Þeir vaka of lengi, mæta þreyttir og skapvondir í skólann og eiga erfitt með að fara eftir reglum sem settar eru.  Þegar skólayfirvöld hafa svo samband heim þá standa foreldrar með börnunum nema hvað og eru oft árásagjarnir og grípa jafnvel til ofbeldis.  Í stað þess að reyna finna leiðir til að refsa eða hvetja þá láta foreldrar undan til að halda friðinn og þetta er útkoman.  En hvernig er íslenskur veruleiki.  Getur þessi lýsinga átt við börn og foreldra á Ísland og kannast kennarar hér við Þessa "sveigjanlegu" foreldra?

Lifið heil

Rósa

Undarlegur dómur

Eftir að hafa heyrt frétt um niðurstöðu Héraðsdóms í máli kennarans á Seltjarnarnesi þá vakna ýmsar spurningar.  Ég get engan veginn verið sammála þessu. Að sjálfsögðu átti kennari sem meiðist í starfi að fá greiddar þessar bætur en móðir nemandans á ekki að þurfa greiða þær.  Sama við hvaða aðstæður þetta slys varð þá hefur hún ekki tækifæri til að vera með barni sínu í skólanum, það er á ábyrgð þeirra sem þar starfa.  Ef starfsmaður sveitafélaga slasast í starfi eiga sveitafélög að vera bótaskyld. En svo vekur þetta upp spurningar um aðstæður nemenda í skólum og aðstæður starfsfólks.  Mér finnst þetta mál gefa okkur tilefni til að skoða þau mál vel enn betur en hefur verið gert til þessa.Við erum með skóla án aðgreiningar og  erfiðari mál heldur en oft áður, fleiri nemendur sem glíma við þroskafrávik, geðraskanir og önnur vandamál. Við erum með kennara og annað starfsfólk sem er misvel í stakk búið til að takast á við þessi vandamál og oft spyr maður sig hvað þarf að gerast til þess að eitthvað gerist.  Það þarf að ræða þessi mál, fá þau upp á yfirborðið þannig að við getum tryggt að allir séu öruggir í skólanum, og ef eitthvað gerist sé það á hreinu hver sé bótaskyldur.  

Lifið heil

Rósa

Dæmd til að greiða kennara 10 milljónir í bætur

Æ greyið

Vinur minn, ungur maður á milli tvítugs og þrítugs, sem er að kaupa sína fyrstu íbúð og á von á fyrsta barni sínu fékk upphringingu frá Capacent á dögunum.  Þetta var launakönnun sem þeir gera reglulega og vinur minn svo heppinn að vera dreginn út.  Hann var spurður hvað hann hefði í laun á mánuði: ertu með undir 250.000 þúsund, 250 - 400.000 og svona hélt spyrillinn áfram.  Þegar hún loks stoppaði upptalninguna gat vinur minn stunið upp "Þetta sem þú nefndir fyrst undir 250" þá spurði forvitinn spyrillinn "við hvað starfar þú'" og vinur minn sagði stoltur "grunnskólakennari". Í stað þess að fara í næstu spurningu þá missti spyrillinn út úr sér "æ greyið"!!!!

 

Lifið heil

Rósa 

Áhugaverður útvarpsþáttur

Langaði að vekja athygli ykkar á útvarpsþáttaröð sem hefur göngu sína á morgun laugardaginn 8. mars. Ekki vanþörf á að hefja kennarastarfið til vegs og virðinga.

Útvarpsþáttaröð um kennara og kennarastarfið hefst á Rás 1 klukkan 14:40 á morgun, laugardag. Þættirnir verða sex talsins og eru 40 mínútur hver.

Dagskrárgerðarmenn eru Anna Margrét Sigurðardóttir og Leifur Hauksson.

Elna Katrín Jónsdóttir og Kristín Elfa Guðnadóttir komu hugmyndinni á framfæri og unnu að undirbúningi þáttanna fyrir hönd KÍ, og afmælisnefndar KÍ og KHÍ í tilefni af hundrað ára afmæli Kennaraskólans (síðar Kennaraháskólans).

Þættir þar sem fjallað er um kennarann og kennarastarfið fyrr og nú frá ýmsum hliðum. Hvað dregur fólk að kennarastarfinu? Hvað er skemmtilegt, leiðinlegt, áhugavert, erfitt eða spennandi við þetta starf? Við ræðum líðan kennarans í skólastofunni, hvaða áhrif kennarar geta haft í lífi nemenda sinna, samskipti við foreldra og aðra kennara, kynjaskiptingu í kennarastétt og hlutverk kennarans sem hliðvörður þekkingar og vegvísir til framtíðar.

Síðast, en ekki síst, verður horft fram á veg. Hver er þróunin í umhverfi og starfsháttum kennara? Munu kennarar og nemendur framtíðarinnar hittast í sýndarskólastofum?

 

Góða helgi

Rósa

Að hætta að kenna

Jæja enn og aftur stend ég mig að því að velta þessari spurningu fyrir mér.  Á ég að hætta að kenna og finna mér "betri"vinnu?  Mér finnst gaman í vinnunni, ég fæ að ráða mér nokkuð sjálf, hef áhrif á vinnustaðinn og er í góðu samstarfi við stjórnendur og samstarfsfól.  En hvað er þá að trufla? Jú ég hef áhyggjur af óstöðugleika í skólum borgarinnar, of margir af mínum vinnufélögum mínum og kennurum í öðrum skólum eru að hugsa sér til hreyfings, of fáir horfa á verkefnin sem 2-3 ára ferli eða lengra.  Þetta hamlar allri þróun sem verður að eiga sér stað í skólum sem við komumst eitthvað upp úr hjólförunum.  Ég talaði við vinkonu mína - kennara- sem sagði mér að hún væri að hugsa um að hætta þessu alveg, treysti sér ekki lengur í þessi samskipti við foreldra og þessa ábyrgð sem fylgir starfi umsjónarkennarans, þetta sama hafði ég heyrt frá annarri vinkonu minni vikunni áður.  Báðar kennarar með þó nokkra reynslu.  Ég veit um of marga sem eru búnir að segja upp, búnir að ráða sig annað, búnir að skrá sig í nám eða eru komnir á aldur.  Því geri ég ráð fyrir að næsti vetur verði erfiður, ekki síst eftir að hafa hlustað á Ólaf Loftsson úrskýra árherslu í komandi kjaraviðræðum.  Ég er að velta því fyrir mér hvort ég nenni að vera í sama starfinu en vera alltaf að byrja upp á nýtt.............

Lifið heil

Rósa þreytta 

Leiðréttir Júlíus?

Júlíus Vífill formaður menntaráðs og áhugamaður um borgarstjóraembættið segir að leiðrétta þurfi laun kennara. Vonandi er Júlli þá liðsmaður góður í komandi kjarasamningum.  Jú við viljum að laun okkar séu leiðrétt þannig að ekki verði nauðsynlegt að taka hækkanir okkur til handa inn í kaupahækkun.  Þetta að leiðrétta laun kennara hef ég reyndar heyrt frá því að ég fór að kenna. Vonandi verður gengið frá því í eitt skipti fyrir öll.  Þannig að í framtíðinni verði hægt að tala um almenna kauphækkun.  En af hverju þarf að leiðrétta?  Kennarar hafa dregist verulega aftur úr miðað við þær stéttir sem þeir voru áður samferða, á sama tíma hefur álagið á kennara margfaldast.  Með auknum kröfum, dögum og tímum höfum við fengið aukakrónur sem hafa fallið undir kauphækkanir er voru það ekki í raun. Hver fær ekki meiri pening fyrir meiri vinnu?  En það er annað sem Júlli er til í meira t.d  að aðstoða við ímyndunarvinnu kennarastarfsins í samvinnu við kennarahreyfinguna.  Já þar vantar góðan liðstyrk því sú herferð sem kennarahreyfingin hefur farið í  undanfarið hefur litlu skilað.  Þetta er hægt að gera þegar búið er að "leiðrétta" launin, fá inn í skólana fagmenntað fólk sem hefur virkilega áhuga á starfi sínu en er ekki endalaust með hugann við að betra væri nú að vinna annars staðar. Svo er spurning með gæðaeftirlitið.  Er ekki gæðaeftirlit á mörgum vinnustöðum?  Er mikið um þetta í skólastarfinu? Þá er ég að tala um gæðaeftirlit sem er markvisst og skilar árangri.

Lifið heil

Rósa bjartsýna 

Að vinna fyrir sér

Mér verður oft tíðrætt um launamál kennara og læt ekki staðar numið.  Í dag hitti ég kennara sem hefur starfað sem við kennslu í 20 ár.  Hún er fræbær kennari, mikil fagmanneskja, ósérhlífin, dugleg, hjálpsöm og svona get ég lengi talið.  Við ræddum um launamál.  Hvað við værum með í laun og hve vinnuframlagið væri mikið.  Þá sagði hún setningu sem situr í mér. Þetta var eitthvað á þessa leið.  "Ég hef nú ekkert verið að pæla mikið í hærri launum ég hef alltaf haft ágæta fyrirvinnu". Mér brá og þetta kom mér á óvart en eflaust hef ég eitthvað misskilið hana. En er ekki þarna sem hundurinn liggur grafinn? Er þetta ekki einmitt ástæðan fyrir því að launin eru ekki hærri, "kennslukonur" hafa haft of góðar fyrirvinnur.  Ég er fyrirvinna, sama hve stór fjölskylda mín er, hverjum ég bý með ef einhverjum, mitt starf er vinnan mín sem ég er svo heppin að hafa gaman af, ekki áhugamál.

Lifið heil

Rósa fyrirvinna 

Ég er bara fimm ára....

Sjálfstæðismenn lögðu 2. nóvember sl. fram tillögu í borgarstjórn þess efnis að komið verði á fót fimm ára deildum við grunnskóla í Reykjavík . Menntaráð og leikskólaráð Reykjavíkur hafa nú samþykkt að kannaðir verði möguleikar á að stofna fimm ára deildir við fjóra grunnskóla borgarinnar í haust. Ég hef oft verið þeirrar skoðunar að færa megi skólastarfið niður en nú er ég efins.  Mikið og gott starf hefur verið unnið í leikskólum undanfarið og mikil þróun í gangi.  Fræðimenn eru sammála um að ungum börnum henti best að læra í leik og skapandi starfi, en leikskólar skipuleggi lærdómsumhverfi barna út frá þeirri hugmyndafræði. Í könnun á meðal foreldra hefur komið í ljós að þeir eru ánægðir með leikskólana.  Ef bæta á við einum árgangi í skólana þarf margt að koma til og tel ég að nokkra mánaða vinna sé ekki nógur undirbúningur fyrir þetta stóra skref.  Við vitum að í skólanum er of mikið lagt upp úr bóklegu námi og áherslur í þá veru of miklar hjá mörgum sem stunda nú nám í 1. bekk.  Hvernig verður það í 5 ára bekk?  Eru úrræði í heilsdagsvistun nógu góð í dag miðað við þann fjölda sem þarf á þeirri þjónustu að halda að við getum bætt við heilum árgangi.  Eru biðlistar tæmdir í heilsdagsskólum þannig að ekkert mál er að bæta við 20 - 40 nemendum í þá vistun? Margar spurningar vakni og eflaust á eftir að svara þeim öllum áður en þetta verður endanlega ákveðið en vonandi verður leitað svara hjá þeim sem vinna í þessu umhverfi, kennara, skólastjórnendur bæði í leik- og grunnskóla og ekki síst foreldra.  Og þar sem ekki er lagaleg heimild fyrir þessu verður þetta þá framkvæmanlegt í nafni tilraunastarfs?

Lifið heil

Rósa