Hvað færðu í laun?

Eins og flestir vita var skrifað undir nýja kjarasamninga kennara nú í vikunni.  Kennarar sitja heima og rýna í samninginn og reikna út hver launahækkunin verður, máta sjálfan sig og aðra.  Þetta reynist oft erfitt og en þeir hjá Austurglugganum hafa útbúið reiknivél sem er auðveld í notkun.  Hún reiknar út nákvæmlega hve hækkunin verður og er byggð á forsendum nýs kjarasamnings.  Gott að reikna nú út launin áður en haldið er af stað í kröfugöngu á morgun.Birt án ábyrgðar en hér er reiknivélin.

Lifið heil

Rósa reikni........ 

 

Of snemmt að fagna

Gott að skrifað var undir án láta en ég held að of snemmt sé að fagna.  Fréttaflutningur frá þessu er á þann veg að búið sé að samþykkja samninga.  Ég á eftir að sjá að kennarar geri það.  Verðbólguspáin er há og hvað erum við þá að fá út úr þessu?  Síðan má ekki gleymi því að stór hluti kennarastéttarinnar er yfir fertugt og hvað er sá hópur að fá? Það er sá hópur sem vegur mest í atkvæðagreiðslu en ekki í launum að þessu sinni, frekar en svo oft áður.  Þótt ég sé rúmlega fertug átti ég eftir að fá eina aldurtengda hækkun nú dettur hún út.  Verið er að jafna laun ungra kennara, eflaust til að halda þeim inni og til að lokka nýja að en hver lætur lokkast af 210.000 króna mánaðarlaunum.  Byrjendur í kennslu fá þau laun og hækka upp í 265.000 á samningstímanum.  Þetta lokkar nú ekki marga, haldið þið það? Þess vegna skulum við ekki fagna og snemma og sjá hvað hvað kennarar segja. Ég hef tekið ákvörðun.

Lifið heil

Rósa, ekki rík í bráð 

Laun grunnskólakennara hækka

Skrýtið nafn

"Mamma mamma" sagði litli drengurinn þegar hann kom heim úr skólanum. "Það var nýr strákur að byrja í bekknum mínum í dag og hann heitir voða skrýtnu nafni sem ég hef aldrei heyrt áður". Mamman horfir spennt á drenginn og hann klárar "hann heitir Guðmundur"!!!

 Ætli bekkjarlistinn eigi eftir að vera svona í framtíðinni:

Eggrún Bogey, Beinteinn Búri,

Oddfreyja Örbrún, Dufþakur Dreki

Dúfa Snót, Hildiglúmur Bambi

Ljótunn Hlökk, Fengur Fífill

Himinbjörg Hind, Gottsveinn Galdur

Randalín Þrá, Grankell Safír

Baldey Blíða, Kaktus Ylur

Bóthildur Brák, Þorgautur Þyrnir

Loftveig Vísa, Melkólmur Grani

Þúfa Þöll, Ljótur Ljósálfur

Þjóðbjörg Þula, Náttmörður Neisti

Stígheiður Stjarna, Hlöðmundur Hrappur

Skarpheiður Skuld, Hraunar Grani

Kormlöð Þrá, Ráðvarður Otur

Ægileif Hlökk, Reginbaldur Rómeó

Venus Vígdögg, Kópur Kristall

Hugljúf Ísmey, Þangbrandur Þjálfi

Ormheiður Pollý, Sigurlás Skefill

Geirlöð Gytta, Þjóðbjörn Skuggi

Þetta er allt nöfn sem mannanafnanefnd hefur samþykkt nýlega.

Góða helgi

Rósa Randalín

Langt helgarfrí

Við tókum okkur aðeins lengra helgarfrí en venjulega og skelltum okkur í bústað.  Fórum eftir vinnu á fimmtudaginn og komum heim of snemma á sunnudagsmorgni því sonurinn þurfti að spila fótboltaleik. Þetta var hreint frábært frí og veðrið var betra en best.  Sól og hiti og við sólbrennd. 

Skólastjórar áhyggjufullir

 

Áheyrnarfulltrúi Skólastjórafélags Reykjavíkur lagði fram svohljóðandi ályktun frá fundi Skólastjórafélags Reykjavíkur sem haldinn var 4. apríl sl.:

Fundarmenn á félagsfundi Skólastjórafélags Reykjavíkur, sem haldinn var föstudaginn 4. apríl á Grand Hótel, hvetja stjórnendur Reykjavíkurborgar,samninganefnd Kennarasambands Íslands og launanefnd sveitarfélaga til að virða þau tímamörk sem sett voru í upphafi viðræðna og ljúka kjarasamningum kennara og atkvæðagreiðslu um þá fyrir 1. maí. Dragist samningagerð á langinn er hætta á að kennarar hverfi úr starfi með þeim afleiðingum að grunnskólar í Reykjavík verði ekki fullmannaðir næsta haust.

Síðustu helgar hafa verið fjölmargar auglýsingar um kennarastöður í Reykjavík.  Heyrst hefur að ekki hafa margir sýnt þeim áhuga.  Kennara, bæði þeir sem eru í starfi og þeir sem hugsanlega ætla aftur í kennslu halda að sér höndum og bíða eftir því að heyra hvernig launaliðurinn í þessum viðræðum verður.  Vonandi þurfum við ekki að bíða of lengi svo hægt sé að halda áfram með undirbúning fyrir næsta skólaár eða skila inn uppsagnarbréfi.

Lifið heil

Rósa raunamædda

Af kjaraviðræðum

Nýlega birtist í fjölmiðlun tilkynning frá samninganefnd KÍ að allt gengi vel.  Viðræður hafa staðið yfir og allt í lukkunnar velstandi.  Það er búið að ganga frá flestum þáttum og bara eftir að að ræða launaliðinn, eins og það sé eitthvað bara.  Í febrúar fór ég á kynningarfund með Ólafi Loftssyni formanni Félags grunnskólakennara og þar kom skýrt fram að ekki ætti að hrófla við neinu í þessum samningum öðru en laununum.  Hvað er það þá sem þeir hafa verið að ræða, gaman væri að vita. Kalli Björns sagði að allt hefði farið fram í mestu vinsemd.  En gaman hjá þeim.  Það verður örugglega ekki eins gaman þegar kemur að því að ræða laun en við bíðum spennt.

Lifið heil

Rósa 

Mammamamma

Fór á skemmtilega leiksýningu í gær, sem ég get mælt með.  Bauð dóttur minni með mér að sjá Mammamamma í Hafnarfjarðarleikhúsinu.  Bara skemmtileg, ekkert væmin og nokkuð sönn.  Það var tekið á þeim þáttum sem kona upplifir við það að ganga með barn, fæða það og ala á alla máta.  Þetta var einvala lið leikkvenna, Þórey Sigþórs og María Ellingsen, gamlir Árbæingar, frænkan Magnea Björk og Birgitta Birgis. Umgjörðin var heimilislegt, við fengum púða og ullarsokka til að okkur liði sem best og í lok sýningar var boðið upp á pönnsur.  Mæli með þessari sýningu fyrir allar mæður,konur, dætur..... Það voru tveir karlar sem sátu á næsta bekk og þegar það kom smá þögn í sýninguna snéri annar sér að hinum og sagði "skilur þú eitthvað í þessu? og hristi hausinn. Það ætti kannski að draga þá með svo þeir skilji þetta betur.

Af hverju kennari?

Í gegnum tíðina hef ég oft fengið þessa spurningu: hvað varð til þess að þú ákvaðst að verða kennari?  Mín saga er þessi.  Það var algjör tilviljun.  En svo er kannski ekkert algjör tilviljun eða hvað. Ég var ný orðin stúdent og vann í sjoppu, vissi ekkert hvað ég átti að gera, langaði til útlanda sem óper.  Sótti um tvær barnapíustöður og var hafnað.  Eitt laugardagskvöld í sjoppunni, þegar ekkert var að gera var ég að lesa sunnudagsmoggann, þá kemur fastakúnni inn og heyrir á mér að ég er að velta fyrir mér framtíðinni.  Hann spyr mig hvort mér hafi ekki dottið í hug að fara út á land að kenna það væru svo margir sem gerðu það.  Á mánudeginum byrja ég að hringja á nokkra staði og vita menn, ég gat valið úr kennarastörfum.  Þá voru góð ráð dýr, hvert átti ég borgarbarnið að fara.  Jú, ég vildi ekki fara á of lítinn stað, það yrði að vera bókasafn á staðnum og eitthvað um að vera.  Þá varð Sauðárkrókur fyrir valinu, ég hringdi í Björn í neðra og hann réð mig.  Þar var ég í eitt ár og samkennara mínir reyndu hvað þeir gátu að annað hvort halda mér á staðnum eða að forða mér frá því að gerast kennari.  Það tókst í bili.  Eftir árið fór ég suður, skrapp til Jamaica í 2 mánuði og fór svo að vinna í banka.  Þegar ég hafði unnið eitt ár í bankanum þá fannst mér að ég þyrfti að mennta mig, þá stóð ég frammi fyrir erfiðu vali.  Hvort ætti ég að fara í viðskiptafræðina sem ég ætlaði alltaf að fara í eða í Kennó.  Ég valdi það Kennó því mér fannst kennslan skemmtilegasta vinna sem ég hafði unnið. Valdi ég vitlaust, því get ég ekki svarað.  En ég held líka að þeir kennara sem ég hafði í grunnskóla hafi kannski haft áhrif á þetta val.  Ég var frekar heppin með kennara.  Fyrst skal nefna Valgerði Hrólfsdóttur, hún kenndi mér í 2. bekk, svo falleg og góð, síðan var það Hanna Kristín Stefánsdóttir.  Hún var frumkvöðull og kennslan hennar var framsækin og fjölbreytt.  Í unglingadeild var það Ingvar, hann var harður kall, sem lét okkur hlýða, gekk á höndum til að fanga athygli okkar, hélt uppi aga en umfram allt góður kennari, ég var dugleg í stærðfræði á þessum árum.  Ég held að þessar fyrirmyndir hafi haft áhrif á val mitt þó ég gerði mér ekki grein fyrir því fyrr en seinna.

Lifið heil

Rósa  

Hvað eru mannsæmandi laun?

Jæja þarna er það komið. Kennara vilja verulega kjarabætur í komandi samningum og er þetta ekki fjarri lagi.  En þar sést líka hvað grunnskólakennara hafa dregist aftur úr og það er skömm af því miðað við það álag sem nú hvílir á herðum kennara.  Aukin önnur störf, sum hver ansi illa skilgreind en verða að vinnast. Aukin samskipti við annað starfsfólk s.s þroskaþjálfa, stuðningsfulltrúa og fleiri sem koma að meðal bekkjardeild.  Það þarf að breyta starfheitum eða fara að viðurkenna hve ábyrgð umsjónakennarans er mikil og borga í samræmi við það.  Ég segði já við þessu boði.  Veit samt að þetta er ekki boð. Þar sem þessi könnun er gerð fyrir kÍ hafa niðurstöður hennar eflaust ratað inn á þeirra borð og nú bíðum við spennt eftir fréttum þaðan.En hvernig stendur á því að við höfum dregist svona aftur úr? 

Lifið heil

Rósa vongóða

Kennarar telja að laun eigi að hækka um 24-46%

Barnaþing

Þetta er frábært.  Frábært að fá jákvæðar fréttir úr skólalífinu.  Barnaþingið er skemmtileg tilbreyting fyrir nemendur og kennara og brýtur upp hefðbundið skólastarf.  Þarna fá nemendur að láta álit sitt í ljós á sínu nánasta umhverfi.  Umhverfi og úrbætur í séð með augum þeirra.  Þau finna að hlustað er á þau og vonandi verður tekið tillit til einhverra óska.  Ég fylgdist með nemendum í mínum skóla þegar undirbúningsferlið fór fram.  Gleðin og áhuginn sem skein úr augum þeirra - ja þið hefðuð átt að sjá það!! þó meira rót komi á skólastarfið þá er það þess virði.  Þarna gátu nemendur nýtt sér það sem þau höfðu lært í skólanum og vonandi séð tilganginn.

Meira svona.

Lifið heil

Rósa  

Minni sóðaskap, veggjakrot og stríðni - meira af kakósúpu